Un informe sobre os riscos da vertedura do Prestige realizado por expertos do Centro Antiveneno de Rennes, en Francia, asegura que o fuel é máis tóxico a través da pel que por vía respiratoria ou dixestiva.
Segundo o informe, “o tecido cutáneo é tanto un lugar de acción do petróleo como un lugar de exposición”. Por iso, os expertos aconsellan extremar as medidas de precaución e aconsellan excluír dos traballos de limpeza do fuel a mulleres embarazadas e a persoas con enfermidades respiratorias, cardíacas ou hepáticas ou cutáneas en brazos e mans, informa A Vangarda.
Un dos compoñentes máis tóxicos do fuel son, asegura Alain Baert, do Centro Antiveneno de Rennes, os hidrocarburos aromáticos policíclicos (HAP). Neste sentido, a organización ecoloxista Greenpeace asegurou que o fuel contén compostos do grupo dos HAP en concentracións de 4 a 34 mg/kg. Entre estes compostos atópase o benzopireno ou o indenopireno, cuxos efectos cancerígenos e mutagénicos están demostrados, aseguran os expertos.
“A composición do fuel non é o importante”, asegura Joan Albaigés, do Instituto de Investigacións Químicas e Ambientais de Barcelona (IIQA). “Os compostos detectados no fuel tamén se atopan nos cigarros ou as hamburguesas. O preocupante é que estamos ante un problema gravísimo polas súas repercusións económicas e sociais. O debate debería centrarse en si as operacións de limpeza do fuel están ben organizadas”, corrobora Albaigés.
E é que a situación continúa sendo crítica tras a detección, na zona do afundimento do petroleiro, de novas manchas de fuel. As condicións meterológicas tampouco son favorables aos principais afectados pola mancha, especialmente dos mariscadores esta vez da zona de Arousa, cuxa actividade extractora podería verse vetada se a mancha chega á zona de marisqueo. Até onte, os mariscadores desta zona continuaban cos seus traballos, pero temen que nas próximas horas teñan que abandonar a actividade.
