O último Consello de Ministros aprobou, a proposta da ministra de Sanidade e Política Social, Trinidad Jiménez, dous reais decretos polos que se establecen as normas de identidade e pureza dos colorantes utilizados en produtos alimenticios, e as dos aditivos alimentarios distintos de colorantes e edulcorantes.
“Os colorantes constitúen unha das categorías de aditivos alimentarios utilizados para dar cor e mellorar a presenza dos produtos alimenticios”, sinalaron desde Sanidade. O real decreto aprobado a semana pasada incorpora ao ordenamento xurídico español a Directiva 2008/128/CE da Comisión Europea sobre este tema, mediante a que se refunde a normativa existente para unha maior racionalidade e claridade.
“Os aditivos alimentarios son sustancias ou mesturas de sustancias que, sen constituír por si mesmos alimentos ou posuír valor nutritivo, agréganse a alimentos, bebidas, produtos alimenticios ou alimentarios en cantidade mínima, co obxectivo de modificar as súas características organolépticas, facilitar ou mellorar o seu proceso de elaboración, conservación e/ou uso”, explicou o Ministerio nunha nota de prensa.
A nova regulación sobre aditivos alimentarios distintos a colorantes e edulcorantes, ademais de reunir nun único texto todas as normas vixentes sobre identidade e pureza destes aditivos, incorpora ao dereito español a Directiva 2009/10/CE da Comisión Europea, que ten como principal novidade a redución dos niveis máximos de chumbo en determinados aditivos, como a cera de abellas ou o óxido de calcio.
