Investigadores da área de Bioloxía Molecular e Biotecnoloxía da Asociación Nacional de Fabricantes de Conservas de Peixes e Mariscos (ANFACO-CECOPESCA), unha entidade empresarial sen ánimo de lucro, desenvolveron unha técnica que permite detectar os anisákidos en calquera produto pesqueiro, desde un peixe enteiro, fresco ou conxelado, ata conservas e surimi. O novo sistema baséase en técnicas moleculares e supera as limitacións dos procedementos tradicionais.
“Este método caracterízase pola súa alta especificidade para os xéneros Anisakis, Pseudoterranova, Contracaecum e Hysterothylacium e por unha sensibilidade moi elevada, xa que permite a detección do parásito aínda que se atope en cantidades moi baixas no produto analizado”, explicou Montserrat Espiñeira, coautora do estudo, cuxas conclusións se publican no último número da revista “Food Control”.
É un método rápido e eficaz que, a diferenza dos procedementos anteriores, pode aplicarse a calquera produto pesqueiro sen ter en conta o grao de transformación ao que se someteu. Os métodos usados ata agora para a detección de larvas de anisákidos eran o exame visual, a transiluminación e a dixestión por mollo gástrico artificial. Estes sistemas tradicionais non permiten analizar as especies moi grandes, nin aplicarse a produtos procesados.
A presenza de larvas de anisákidos, que parasitan o tecido muscular e as vísceras, describiuse en numerosas especies de peces e cefalópodos. Os peixes parasitados son, entre outros, o bacallau, pescada, xurelo, sardiña, boquerón, salmón, arenque, bonito, pixota, rodaballo, fletán ou abadexo. No grupo dos cefalópodos, a lura e a sepia teñen unha maior parasitación. Os niveis de prevalencia dos anisákidos e os graos de parasitación son moi variables e dependen de factores como a especie de hospedador, a zona xeográfica, a época do ano e as características individuais de cada exemplar considerado. O ser humano é só un hóspede accidental que se interpón no ciclo do parásito.
A anisakidosis é unha infección gastrointestinal que afecta as persoas cando estas consomen pescado parasitado cru, pouco cociñado ou sometido a tratamentos que non garanten a destrución das larvas (marinados, en vinagre, en salgadura, afumado en frío, secos, etc.). Os signos clínicos que se orixinan son dores abdominais, nauseas, vómitos e diarrea. Ademais, as larvas poden ocasionar reaccións alérxicas, desde urticarias ata respostas anafilácticas nos casos máis graves.
