Vietnam confirma o cuarto caso de infección polo virus da gripe aviaria

• Autor: Por xavi
• Data de publicación: Luns, 17deXaneirode2005

Con esta nova confirmación, son xa 31 os casos notificados en Vietnam desde xaneiro de 2004, 23 dos cales foron mortais. Como resposta, o goberno de Vietnam reuniuse con expertos de sanidade e con representantes da Organización Mundial da Saúde (OMS) e a Organización das Nacións Unidas para a Agricultura e a Alimentación (FAO) en Vietnam.

Entre os expertos suscitou o temor de que o recente maremoto de Asia Sudoriental poida incrementar o risco de que se produza unha pandemia de gripe. O risco de pandemia depende da difusión do virus H5N1 nas aves de curral domésticas, da frecuencia da transmisión do virus ao ser humano e da cocirculación de virus da gripe humana.

A pesar de que ata agora as zonas con maior prevalencia de gripe aviaria non se viron afectadas directamente o maremoto, toda actividade que propague a gripe aviaria aumenta a posibilidade de que apareza un virus pandémico. O risco de importación da gripe aviaria ás zonas afectadas polo maremoto pódese reducir controlando o movemento de aves de curral procedentes das zonas onde se produciu brotes de gripe aviaria. A OMS destaca que é importante asegurarse de que as aves de curral infectadas non entren na cadea alimentaria a través das actividades de socorro alimentario urxente.