O Ministerio de Educación, Cultura e Deporte fixo pública a convocatoria de 1.800 bolsas para os Campus Científicos de Verán no Boletín Oficial do Estado (BOE). Estas axudas están destinadas a alumnos de 4º da ESO e de 1º de Bacharelato con especiais habilidades na área científica-tecnolóxica. Aínda que Educación ofertou 600 prazas máis que en 2011, a duración dos programas pasa de 14 días aos 7 días da actual convocatoria.
Para acceder a estas prazas, os aspirantes deberán acreditar unha nota media igual ou superior a 7,5 puntos e terán que superar unha proba de acceso cunha puntuación de, polo menos, 5 puntos. Estas avaliacións obrigatorias consistirán nun test de resposta alternativa que se realizará a través de Internet nos centros educativos o día que se determine.
Segundo publicou o BOE, o prazo para efectuar as solicitudes comezou o 28 de abril e finalizará o 16 de maio. As inscricións deberán realizarse a través da páxina web habilitada e os beneficiarios deberán de abonar 90 euros en concepto de matrícula no caso de que resulten seleccionados para formar parte do programa.
A bolsa cubrirá os gastos de materiais, actividades complementarias, monitores, seguro de responsabilidade civil e accidente, aloxamento e manutención. O Goberno destinou a este programa un total de 450.000 euros con cargo aos Orzamentos Xerais do Estado, o que supón unha contía por alumno de 250 euros, 36 euros máis que en 2011.
O programa Campus Científicos de Verán desenvolverase entre o 1 e o 28 de xuño en institutos e departamentos de investigación adscritos aos Campus de Excelencia Internacional ou Rexional de 16 universidades españolas. Os centros aos que asistirán os alumnos seleccionados serán: Universidade Autónoma de Madrid, Universidade de Cádiz, Carlos III de Madrid, Complutense de Madrid, Granada, As Palmas, Murcia, Oviedo, País Vasco, Politécnica de Cataluña, Rovira i Virgili, Salamanca, Sevilla, Santiago de Compostela, Vigo e Valencia.
