A Axencia Española de Cooperación Internacional para o Desenvolvemento (AECID) recibiu o Certificado de Homologación da Unión Europea, como recoñecemento do compromiso da entidade española “coa eficacia e a calidade da axuda”, informou a Secretaria de Estado de Cooperación Internacional para o Desenvolvemento, Soraya Rodríguez, durante a presentación da campaña e actos de VINA Semana da Cooperación que comeza o venres 2 de setembro e estenderase ata o xoves 8 de setembro.
Esta certificación implica para a AECID, non só homologar o seu funcionamento con outras axencias de cooperación de ámbito europeo como a GTZ alemá ou a DFID inglesa, senón tamén participar na Cooperación Delegada da Unión Europea, sinalou Rodríguez. “A decisión de EuropeAid-a dirección responsable da política de desenvolvemento e a axuda europea – supón unha importante oportunidade para o conxunto de actores da cooperación española e un avance significativo cara a unha mellor e máis eficaz coordinación cos nosos socios europeos”, engadiu.
Coa lema “O valor de dar futuro”, VINA Semana da Cooperación reúne un conxunto de accións de sensibilización organizados pola AECID en coordinación coas ONGD españolas. O obxectivo da presente edición da iniciativa é pór de relevo que a cooperación para o desenvolvemento “non é un acto asistencial nin de caridade, senón unha canle para acompañar, basicamente mediante financiamento e o apoio técnico, aos países e poboacións máis vulnerables do planeta no seu desenvolvemento, co fin de lograr unha sociedade global máis xusta”.
Esta semana organízase cada ano, en torno ao 8 de setembro, establecida en 2006 como Día do Cooperante. O Consello de Ministros aprobou nese ano, por Real Decreto, a conmemoración desta data en recoñecemento ao labor de miles de cooperantes en todo o mundo que traballan pola consecución dos Obxectivos de Desenvolvemento do Milenio, oito obxectivos subscritos por 189 xefes de estado e de goberno o 8 de setembro de 2000, lembrou a AECID.
Se en 2010, a Semana da Cooperación puxo o foco na emerxencia sufrida por Haití, nesta sexta edición a Semana da Cooperación estará enfocada nas chamadas Primaveras Árabes, “un fenómeno político e social que centrou a actualidade internacional durante os últimos meses. As Primaveras Árabes, abordadas desde o punto de vista da cooperación ao desenvolvemento, protagonizarán un cinema fórum, un concerto e un encontro internacional de xornalistas”, informou a axencia española.
