Dar ás comunidades cafetaleras dos países do Sur a oportunidade de mellorar o seu nivel de vida é o principal labor da Fundación Café Mundi, creada en 2004 a iniciativa dun grupo de empresas do sector cafetero español. Iso materialízase a través do financiamento de micro-proxectos inferiores a 10.000 euros que contribúan a un desenvolvemento económico e social sustentable a longo prazo, investindo en educación, formación profesional e na mellora das condicións de vida en xeral das comunidades.
Desde a citada institución explican que se trata dun proxecto aberto a todas aquelas empresas que teñen relación co mundo do café e que desexan adquirir un compromiso de apoio aos obxectivos de desenvolvemento humano perseguidos pola fundación. Colombia, Brasil, Honduras, Uganda e Vietnam son algúns dos países nos que Café Mundi está a levar a cabo proxectos de sustentabilidade social.
Importantes compañías nacionais dedicadas tanto á importación, como á transformación e comercialización de café cóntanse entre os 16 socios que forman parte da Fundación Café Mundi, que ten varios novos programas de desenvolvemento en proxecto. Así, a fundación conta cun selo, o “Selo de Café Mundi”, que informa o consumidor de que parte do diñeiro que está a gastar destínase á realización de proxectos de sustentabilidade e responsabilidade social en países en desenvolvemento.
