As páxinas web deben ofrecer fácil acceso e uso ás persoas cegas e deficientes visuais, segundo un chamamento realizado onte pola Fundación ONCE. Iso é posible evitando recursos accesorios, como efectos de flash, e propiciando a difusión de textos estáticos, en formatos que non inclúan columnas.
A petición foi realizada por varios responsables da Fundación ONCE, que celebraban en Santiago de Compostela unha xornada dedicada á difusión e reivindicación de Internet para as persoas cegas. O obxectivo desta xornada, enmarcada na celebración do Día de Internet, é difundir todas as posibilidades que ofrece a sociedade da información e as novas tecnoloxías ás persoas cegas ou con deficiencias visuais, fomentar o seu uso e reivindicar a deseñadores, institucións e entidades privadas para que fagan as súas webs “accesibles” a este colectivo, explicou o xefe de Servizos Sociais da Delegación Territorial de ONCE en Galicia, Arturo Parrado.
Cada vez hai máis persoas con deficiencias visuais e con cegueira que se interesan por acceder a Internet e por usar a compra “en liña” ou outros recursos, asegurou pola súa banda o director de ONCE en Santiago, Víctor López Eirís. Por iso, as webs “teñen que ser accesibles”, reclamou.
Ao redor desta mesma cuestión, o instrutor tiflotécnico do ONCE, Juan Carlos Buño, especializado en tecnoloxías para cegos, explicou que, no caso de Internet, a accesibilidade “cada vez vai sendo mellor”, grazas á sensibilización social e pola necesidade de rapidez nos buscadores como Google. No entanto, tamén advertiu de que é necesario que as webs teñan “usabilidade”, que sexan “sinxelas e con ligazóns claras”.
