O número de nenos que sofren desnutrición nos centros de alimentación que Save the Children ten na zona de Puntland, no norte de Somalia, chegou a duplicarse no últimos seis meses (de 1.800 a 3.500 nenos), alertou a ONG, que asegura que esta cifra é a máis elevada que se rexistra en Puntland desde que o seu programa de alimentación comezou hai un ano. Este incremento da desnutrición é consecuencia da seca, a guerra e o aumento dos prezos dos alimentos, que provocou “ consecuencias nefastas nos máis vulnerables”, sinala a organización.
As cifras mensuais de nenos desnutridos recollidas en Bosaso e Garowe, na rexión de Puntland, “indican que a crise alimentaria é cada vez máis severa”, asegura Save the Children. “Os campamentos en Bosaso, no norte do país, son estables, pero as condicións en calquera outro lugar do país son tan graves que as familias están preparadas para emprender o difícil e perigosa viaxe desde a capital Somalí de Mogadishu e outras partes da parte central de Somalia, afectadas pola seca, para chegar ata Bosaso”, explica a organización.
Segundo datos que manexa a ONG, en África do Leste nove millóns de persoas enfróntanse á crise alimentaria, e en Somalia a situación é especialmente grave. Cifras recentes de Nacións Unidas indican que o número de nenos que sofren desnutrición duplicouse desde xaneiro en moitas das áreas afectadas. Estímase que un de cada tres nenos no sur e o centro de Somalia, e case un cuarto de todos os menores de Bosaso padecen desnutrición.
Para tratar de mellorar esta situación, Save the Children proporciona alimentación suplementaria a 9.000 nenos en 60 centros de alimentación no sur de Somalia e a rexión de Puntland. A ONG de infancia reparte alimentación terapéutica a nenos gravemente desnutridos e distribúe racións mensuais ás familias con menores no seu programa de alimentación suplementaria.
“Queremos ampliar o noso traballo para proporcionar alimentos ás nais e os seus fillos, refuxio e atención sanitaria. Os nenos que están todo o día sós coidando dos seus irmáns necesitan educación e protección”, indicou a directora de Emerxencias de Save the Children en Somalia, Sonia Zambakides. “Xa temos equipos que proporcionan axuda para salvar as vidas destes nenos en Somalia, pero necesitamos máis fondos de maneira urxente para poder ampliar o noso traballo e chegar a miles de nenos máis”, engadiu Zambakides. As persoas que queiran colaborar con este labor poden realizar as súas achegas ao Fondo de Emerxencias da ONG no número de conta 0049-1837-58-2910344142 do Banco Santander, a través do número de teléfono 902 013 224 ou desde a súa páxina en Internet www.savethechildren.es.
