A organización non gobernamental Mans Unidas puxo onte en marcha a campaña “Fagamos do mundo a terra de todos”, que abarcará o próximos tres anos e coa que pretende conseguir que o fenómeno da globalización sexa solidario cos países en vías de desenvolvemento.
A presidenta da ONG, Ana Álvarez, asegurou que as accións teñen que estar encamiñadas a lograr un mundo “máis xusto e máis humano”, nun momento en que a globalización “inflúe sobre a sorte de todos os seres humanos”. Álvarez afirmou que a globalización abre un panorama de incertezas que afectan a todos, “porque os ricos son máis ricos e os pobres son máis pobres”. Engadiu que a solidariedade “é una ferramenta paira erradicar a pobreza e dignificar ao home”.
Xunto a Ana Álvarez, na presentación da campaña compareceu o sacerdote salesiano Rosalvino Morán, un leonés que emigrou de neno a Brasil, onde fundou a Obra Social de Itaquera, un barrio de Sao Paulo. O pai Rosalvino advertiu de que “non hai que asustarse coa globalización, porque xa chegou”, e ante ela hai que pór medios paira a “profesionalización dos cidadáns, de maneira que consigan integrarse na sociedade e non ser uns desempregados eternos”.
A lema da campaña paira os próximos tres anos “Fagamos do mundo a terra de todos”, concrétase paira este ano no “futuro do mundo, compromiso de todos”, e vén acompañado de anuncios en prensa escrita e “anuncios” paira televisión.
Mans Unidas recadou o ano pasado 41,4 millóns de euros, case un 3% máis que en 2002, dos que 37,6 millóns serán destinados a proxectos en países en desenvolvemento.
