Tan só 27 céntimos de euro ao día durante os primeiros dous anos da vida dun neno protexeríanlle dos devastadores efectos da malnutrición. Esta é unha das conclusións do informe “Fame de cambios” sobre malnutrición infantil que presenta Save the Children en coincidencia co Cume mundial sobre a alimentación que comeza hoxe en Roma. O documento tamén revela que máis de 178 millóns de nenos sofren actualmente malnutrición crónica, causa dun terzo de todas as mortes infantís a nivel mundial. “Isto quere dicir que máis de 25.000 nenos perderán a vida por causas relacionadas coa malnutrición durante o tres días que dura o cume de Roma”, denuncia a ONG.
O documento asegura que “con só 167 euros pódese proporcionar a un neno famento o tipo adecuado de alimentos e apoio para evitar que perda a vida por mor da malnutrición e protexer o seu cerebro e o seu organismo de danos permanentes como consecuencia da fame”. Por iso, Save the Children reclama que durante o Cume os líderes mundiais tomen accións para evitar que os efectos da malnutrición sexan permanentes, porque a cantidade que gastan os gobernos dos países ricos en nutrición é significativamente inferior ao que se require.
Problema desatendido
O director de Save the Children, Alberto Soteres, afirma que “os nenos e nenas perden a vida porque os líderes mundiais fracasan na tarefa de abordar os elevados niveis de malnutrición que provocan un terzo das mortes infantís cada ano. A ameaza combinada do incremento dos prezos dos alimentos, o cambio climático e a crise económica, ameazan con elevar esas cifras. Estas mortes non son feitos aleatorios fóra do noso control, son o resultado de decisións políticas tomadas por gobernos”.
Soteres sinala tamén “sabemos como tratar a fame infantil e sabemos canto costa. Á nutrición non se lle concede a importancia que merece e isto debe cambiar. O resultado deste cume mundial sobre a alimentación debe ser un compromiso firme para acabar coa fame infantil para sempre. É escandaloso que os líderes mundiais desatendan a nutrición cando o problema é tan grande e a solución é tan obvia”.
A ONG reclama o compromiso de que se invistan 167 euros en cada neno e nena ata a idade de dous anos. Esta cantidade custearía solucións probadas que reducen a fame, tales como promover a lactación materna e proporcionar ás familias recursos para os seus fillos poidan dispor de alimentos e vitaminas.
No informe da organización humanitaria destácase que nalgúns países tan só o 5% dos nenos teñen unha dieta o suficientemente variada, “o que quere dicir que o resto dos nenos non reciben alimentos suficientemente variados nin todas as vitaminas necesarias para que os seus cerebros e organismos poidan desenvolverse adecuadamente”.
