O Ministerio de Industria, Comercio e Turismo abriu o prazo de presentación de ofertas para a xestión en España de tres números europeos harmonizados de interese social. A oferta consiste na implantación de servizos de axuda telefónica ás vítimas de delitos (116006), médico de garda para casos non graves (116117) e apoio emocional (116123).
Estes teléfonos serán gratuítos para os usuarios, xa que se xestionarán a través dun sistema de cobro revertido automático. Ademais, está previsto que sexan servizos abertos a todos os cidadáns, sen necesidade de rexistro previo, e con pretensión de duración indefinida no tempo.
A través do número 116006, as vítimas de delitos poderán recibir apoio emocional, así como información sobre os seus dereitos e a maneira de facelos efectivos, cun servizo de orientación que informará os organismos aos que o usuario pode dirixirse. O 116117 ofrecerá á cidadáns asistencia médica para situacións nas que non haxa perigo de morte, con atención especial en fins de semana e días festivos. Por último, o servizo “de Liña de apoio emocional” será accesible a través do 116123, onde se escoitará e aconsellará a persoas en situacións de soidade ou con crises psicolóxicas.
Entre os requisitos que establece o Goberno, detállase que, no caso de que non se poida prestar unha asistencia continuada de 24 horas ao día, os provedores deberán garantir a existencia de información pública sobre a dispoñibilidade destes servizos. As empresas que presenten ofertas para a xestión deste servizo, que teñen de prazo ata o 30 de setembro, terán prohibido o uso de publicidade ou de técnicas comerciais nestas liñas. Con todo, si poderán aceptar o patrocinio de entidades que participen no financiamento do custo das chamadas e permitirase que os identifiquen nas campañas que dean a coñecer os servizos, aínda que non poderán facelo no transcurso das chamadas.
