O Ministerio de Agricultura, Alimentación e Medio Ambiente, a través do Fondo Español de Garantía Agraria (FEGA), responsable da execución do Plan de Axuda Alimentaria ás persoas máis necesitadas en España, iniciou a subministración de 40.000 toneladas de alimentos de primeira necesidade á Federación Española de Bancos de Alimentos e a Cruz Vermella Española, que á súa vez o distribuirán entre preto de 8.600 entidades benéficas (asilos, comedores sociais, parroquias…). Estímase que estes alimentos chegarán a máis de 1.800.000 persoas.
Esta repartición corresponde á cuarta fase do Plan de 2011, cuxa distribución, prevista para o 31 de decembro do pasado ano, atrasouse co permiso da Comisión Europea. O obxectivo do Ministerio de Agricultura era lograr que o período entre a finalización do Plan 2011 e o comezo do Plan 2012 fose o máis reducido posible “e poder así evitar o desabastecemento dos almacéns das organizacións caritativas nos meses de inverno”.
O Plan de Axuda Alimentaria ás persoas máis necesitadas da Unión Europea (UE) iníciase cada ano coa aprobación do Regulamento comunitario polo que se asignan os recursos dispoñibles, provenientes da intervención pública, aos Estados membros que decidiron participar. España conta para o Plan 2011 con 305.207 toneladas de cereal e 23.507 toneladas de leite desnatada en po, que se adxudicaron á súa vez, mediante os correspondentes concursos públicos, a unha serie de empresas alimentarias “de recoñecido prestixio”.
Como contraprestación polos devanditos produtos de intervención, as empresas forneceron alimentos derivados dos anteriores tales como arroz branco, cereais infantís, tomate frito, galletas, fariña, pasta alimenticia, cacao soluble, crema de verduras deshidratada, caldo de carne, leite UHT, queixo fundido, leite de continuación en po, natillas e bebida pasteurizada de froitas e leite.
