A rexión coñecida como Corno de África, que engloba a Etiopía, Somalia, Kenia, Uganda e Xibutí, sofre a peor seca dos últimos 60 anos e 10 millóns de persoas repartidas nese cinco países xa sofren as súas consecuencias, advertiu onte a Organización das Nacións Unidas (ONU). Esta situación levou a que esa rexión experimente “a maior crise alimentaria da actualidade”, agregou nunha conferencia de prensa a portavoz da Oficina de Asuntos Humanitarios dese organismo, Elizabeth Byrs.
Os prognósticos meteorolóxicos apuntan a que non haberá mellora na situación de seca ata 2012, polo que a ONU invocou a unha mobilización internacional que permita evitar unha nova crise humanitaria. Nalgunhas das zonas máis afectadas, a taxa de malnutrición infantil alcanzou o 30%, o dobre do limiar de emerxencia establecido pola ONU, pero témese que a situación empeore aínda máis.
Byrs sinalou que outro aspecto preocupante é que, tamén como consecuencia da seca, os prezos dos grans que representan unha parte esencial da alimentación local disparáronse e no caso de Kenia custan entre un 30% e un 80% -en función da rexión- que a media do últimos cinco anos. En Etiopía, a inflación relacionada cos alimentos superou o 40% o pasado mes.
Campo de refuxiados desbordado
A seca tamén tivo un impacto no aumento do fluxo de refuxiados e desprazados internos, segundo os datos da Oficina de Asistencia Humanitaria. Uns 15.000 somalíes fuxiron así cada mes do seu país e cruzado a Kenia ou Etiopía. No primeiro país, o campamento de refuxiados de Dadaab -o máis grande do mundo- está repleto ata o límite, o que impide que se poida prestar a axuda apropiada ás vítimas do desastre natural. O persoal de Save the Children que traballa en Dadaab sinalou que os nenos “chegan exhaustos desde Somalia, desnutridos e profundamente deshidratados”. A ONG alertou de que máis de 800 nenos somalíes deixan os seus fogares cada día para fuxir cara a Kenia. En total, unhas 20.000 persoas chegaron ao campo de Dadaab durante as dúas últimas semanas.
A directora de Programas en Kenia de Save the Children, Catherine Fitzgibbon, asegurou que os nenos realizaron longas viaxes en condicións terribles, “ás veces perdendo a familiares durante o traxecto e chegando aos campos con extrema necesidade de coidados sanitarios e seguridade”. A ONG advertiu de que a chegada de novos refuxiados empeorará as condicións dos nenos en Dadaab e que non teñen suficiente alimento, refuxio ou protección. A entidade describe como algunhas familias camiñan durante máis dun mes pola area, “cunha calor abrasador, en busca de comida, auga e refuxio por mor da seca e a consecuente crise alimentaria”. “Moitos deles víronse obrigados a desfacerse das súas pertenzas durante o camiño”, engade.
Entre as consecuencias indirectas da seca extrema que xa se detectan, figura o aumento do abandono escolar, así como de enfermidades en humanos e animais de granxa. Ademais rexístrase unha maior tensión e conflitos entre comunidades que compiten polos escasos recursos que quedan, indicou Elizabeth Byrs. Pola súa banda, Save the Children lanzou unha resposta de emerxencia para axudar ás familias afectadas pola seca e trata a nenos desnutridos, proporciona alimento e auga ás comunidades vulnerales e axuda a facer fronte ás secas, cada vez máis frecuentes.
