A iniciativa de organizar unha serie de actos culturais e lúdicos durante os próximos días por parte da Comisión de Axuda ao Refuxiado (CEAR) enmárcase na celebración, o próximo día 20 de xuño, do Día Mundial do Refuxiado, situación que afecta a 35 millóns de persoas no mundo, principalmente mulleres e nenos. Só Madrid concentra o 19,3% da poboación estranxeira en España. Os últimos datos publicados pola Oficina Rexional de Inmigración da Comunidade de Madrid indican que a finais de 2005 este municipio contaba xa con 949.354 estranxeiros, un 15’28% da poboación, sendo o que maior número de veciños estranxeiros reúne.
Ante esta situación, CEAR Madrid fai un chamamento tanto ás persoas refuxiadas como ás que non o son para potenciar o coñecemento mutuo e compartir as historias humanas que hai detrás de cada unha delas, especialmente a dos máis desprotexidos. “O dereito de asilo está en crise en todo o mundo, pero algúns colectivos sofren dunha forma máis acentuada esta situación: as mulleres áchanse entre os sectores máis vulnerables para acceder a este dereito”. Os últimos datos revelan que máis da metade das persoas desprazadas e/ou refuxiadas que hai no mundo son mulleres adultas e nenas.
“O dereito de asilo está en crise en todo o mundo”
Tanto elas como o resto da poboación refuxiada que chega a España fano a través de Barallas, que se converteu nunha das máis importantes portas de entrada ao noso país. Durante o ano 2006 producíronse na capital española máis de 3.290 solicitudes, o 66,14% das realizadas en todo o territorio español. “Ante esta situación a nosa presenza no aeroporto de Madrid-Barallas é constante, cunha quenda permanente de garda que atende as solicitudes de asilo daquelas persoas que demandan o noso servizo”, explican desde CEAR Madrid.
Como liña transversal de traballo externo, esta ONG veu traballando en obxectivos e actividades relacionados coa convivencia, a participación e o recoñecemento de dereitos civís ou cidadanía. E nesta mesma liña de fomentar a participación púxose en marcha o II Foro Social Mundial das Migracións, baixo a coordinación da Comisión Española de Axuda ao Refuxiado (CEAR) e do Servizo Pastoral dos Migrantes / Berro dos Excluídos de Brasil (SPMSP).
España acaba de asinar un acordo polo que se compromete a crear un fondo de axuda de emerxencia para os refuxiados. Un instrumento de cooperación ao que se destinarán 14,3 millóns de euros este ano, cos que levarán a cabo actividades de asistencia a refuxiados do África subsahariana, Latinoamérica, Oriente Medio e Norte de África.
Destinaranse ao fodo de axuda de emerxencia para os refuxiados un total de 14,3 millóns de euros
En concreto, a cooperación española dirixirase a prestar axuda aos desprazados internos en Colombia, así como aos refuxiados colombianos en Costa Rica e Ecuador. Tamén apoiará os programas de ACNUR nos campos de saharauís de Tindouf (Alxeria) e as accións de axuda de emerxencia en Chad, República do Congo, Burundi, Paquistán e Sahara Occidental.
Doutra banda, España tamén se comprometeu a crear nun futuro próximo un fondo de reserva específico para facer fronte de maneira rápida ás necesidades que poidan ter os refuxiados en caso de crise humanitaria.
