Unha comida ao día non é suficiente, pero é todo o que teñen miles de persoas en África para sobrevivir. En Sudán do Sur declarouse de maneira oficial a fame negra e organizacións como ACNUR piden fondos con urxencia para cubrir as necesidades dun millón de persoas. As malas colleitas e o aumento do número de refuxiados obrigaron a recortar as racións de comida ata o 50%. Neste país está a darse a maior crise de refuxiados do continente africano pero, despois de tres anos de guerra, a atención mediática reduciuse e o financiamento escasea no momento máis necesario. O artigo mostra a realidade da fame en África e de como os refuxiados sursudaneses chegan a Uganda. Tamén explica en que se traduce o apoio económico que chega ás organizacións que traballan co cinco millóns de refuxiados que hai nesta rexión do mundo.
As malas colleitas e a falta de financiamento obrigaron ao Alto Comisionado das Nacións Unidas para os Refuxiados (ACNUR) e ao Programa Mundial de Alimentos de Nacións Unidas (PMA) a recortar o número de racións de comida en 10 países de África. O impacto desta decisión nas familias, cuxa fonte de alimento é a axuda humanitaria, é dramático. Tras fuxir da violencia no seu país, a fame e a desnutrición son o maior perigo para cinco millóns de africanos refuxiados.
Dous dos países máis pobres do mundo, Sudán do Sur e a República Centroafricana, necesitan fondos de maneira urxente para poder atender as necesidades alimentarias dos desprazados e refuxiados nos próximos meses.
E é que en países como Sudán do Sur, Uganda, Camerún, Chad ou Mauritania, as racións de comida reducíronse á metade, aínda que a situación aínda podería empeorar no caso de que non se consigan os fondos necesarios. Polo momento, o 40% dos refuxiados no Corno de África sofre anemia.
Refuxiados de Sudán do Sur que chegan a Uganda
En apenas tres semanas chegaron a Uganda máis refuxiados que en todo o primeiro semestre de 2016. Todas estas persoas acoden desesperadas a campos de desprazados ou países veciños, fuxindo da violencia que azouta varias zonas de Sudán do Sur, un país que vive un conflito desde fai máis de tres anos. Máis do 85% dos refuxiados que recibe son mulleres e nenos, moitos dos cales sofren desnutrición infantil. E o 65% son menores de 18 anos.
En 2016 duplicábase o número de refuxiados respecto dos anos entre 2011 e 2015, pasando de 2,6 a 5 millóns de persoas. Por desgraza, a falta de financiamento leva recortes de comida nos campos de refuxiados e desprazados de 10 países, o que dispara a fame e a desnutrición infantil.
Os refuxiados sursudaneses atópanse nunha situación desesperada e necesitan axuda humanitaria urxente para poder vivir nos centros de tránsito e nos campos de refuxiados que se están montando.
A través de ACNUR pódese colaborar de forma mensual ou puntual achegando a cantidade que se desexe. Aínda que acabar coa fame require dun plan máis ambicioso e o compromiso de moitas persoas, a repartición de alimentos pode ser unha solución a curto prazo.
- Con 25 euros proporciónase alimento tres veces ao día a un neno durante 25 días.
- Con 30 euros unha muller embarazada pode recibir atención médica.
- Con 50 euros está a facilitarse un tratamento nutricional para un menor e leite terapéutico F75 para dous.
- Con 75 euros achéganse alimentos durante tres meses para un neno refuxiado.
- Con 100 euros conséguese que nove persoas refuxiadas teñan acceso á auga.
- Con 200 euros pódese dispor de catro lonas de plástico resistente para reforzar os refuxios.
