A desnutrición a longo prazo leva danos “devastadores e irreversibles” na infancia. A falta de alimentos nutritivos, sumado ás infeccións e enfermidades, provocan que os cerebros dos máis pequenos non se desenvolvan de maneira adecuada. Ademais, polo menos 170 millóns de nenos en todo o mundo padecen un atraso no seu crecemento por mor da desnutrición. Isto implica, non só que a súa estatura sexa menor que a media, senón tamén que perdan cursos escolares e que rendan menos academicamente. Son algúns dos datos que se expoñen no informe de Save the Children, “Unha vida sen fame: como combater a desnutrición infantil”, no que se afirma que, se non se toman medidas, 450 millóns de nenos en todo o mundo sufrirán atrasos no seu desenvolvemento físico e mental durante os próximos 15 anos como consecuencia da desnutrición.
O traballo de Save the Children sinala que cada hora 300 menores perden a vida por desnutrición, que é causa subxacente de máis dun terzo das mortes infantís en todo o mundo -2,6 millóns ao ano dun total de 7,6 millóns-. Os avances que se rexistraron na redución da desnutrición os últimos 20 anos son moi lentos e a combinación de varias tendencias globais -cambio climático, inestabilidade do prezo dos alimentos, inseguridade económica e cambios demográficos- retárdanos aínda máis.
A deficiencia de iodo afecta a un terzo de escolares nos países en desenvolvemento e está relacionada cunha perda de entre 10 e 15 puntos de coeficiente intelectual. Ademais, a desnutrición infantil repercute nas súas vidas como adultos. Calcúlase que os nenos con atraso no seu crecemento gañan un 20% menos cando entran no mercado laboral, di o informe.
Save the Children defende que existen “solucións sinxelas e directas, apoiadas por expertos en nutrición, para reducir a desnutrición infantil”. Os suplementos nutricionais, xunto co impulso de hábitos saudables como o lavado de mans ou a lactación materna, “podería previr a morte de case dous millóns de menores de cinco anos e un considerable número de enfermidades, se chegase á poboación infantil dos 36 países onde vive o 90% dos nenos con desnutrición”, asegura.
A responsable de programas internacionais de Save the Children, Lucía Losoviz, sinala que este é un ano crave para lograr que todos os nenos reciban a nutrición que necesitan e pór fin á crise de desnutrición a nivel global. “Se esperamos ao ano que vén xa será tarde se queremos cumprir co cuarto Obxectivo de desenvolvemento do milenio de reducir en dous terzos a mortalidade en nenos menores de cinco anos para 2015”, precisa.
