Case un milleiro de manuscritos e libros impresos conservados en bibliotecas públicas españolas poden consultarse xa en Internet grazas aos facsímiles dixitais que forman parte da Biblioteca Virtual do Patrimonio Bibliográfico, segundo explicou onte o ministro de Cultura, César Antonio Molina, na presentación da iniciativa.
O ministro apuntou que este proxecto nace como resultado dun “importante esforzo para preservar e difundir da maneira máis ampla o patrimonio depositado en todo tipo de biblioteca de España”. A Biblioteca Virtual do Patrimonio Bibliográfico reúne na dirección http://bvpb.mcu.es 250.000 páxinas de case mil manuscritos e impresos con imaxes que se poden descargar ou consultar por autor, título, data ou época de escritura ou impresión. Ademais, ao longo deste ano engadiranse outras 400.000 páxinas, engadiu a este respecto.
Este é un patrimonio “non tan coñecido como debería” e que “describe século tras século diferentes aspectos da cultura, a vida, a técnica e a historia do libro”, detallou Molina. Entre as coleccións dispoñibles ata agora están os fondos do Mosteiro de Santa María de Huerta, custodiado na Biblioteca Pública de Soria, e os dos Mosteiros de Santes Creus e Poblet, da Biblioteca Pública de Tarragona, con pezas que se remontan aos séculos X e XI. Así mesmo, seleccionáronse documentos da colección Borbón-Lorenzana da Biblioteca de Castela-Mánchaa/Biblioteca Pública de Toledo, que reúnen manuscritos e impresos vinculados á actividade do Cardeal Lorenzana no arcebispado de México, e incunables e impresos da colección luliana da Biblioteca Pública de Palma.
Este proxecto non só “se axusta aos estándares máis avanzados” utilizados en iniciativas deste tipo, elaboradas con arquivos de acceso aberto e mecanismos que facilitan a súa visibilidade nos buscadores de Internet, senón que ademais fomenta o acceso de maneira igualitaria entre os cidadáns de distintas zonas de España e contribúe á construción da Biblioteca Dixital Europea, sinalou o ministro.
