A nova Lei de Propiedade Intelectual, que o Goberno aprobará antes de finalizar marzo, gravará as impresoras multifuncionais cun canon que irá do 3% ao 15% sobre o seu prezo inicial, segundo a Asociación Multisectorial de Empresas de Electrónica e Comunicacións (Asimelec).
Na actualidade, os compradores destas impresoras xa pagan un imposto de 15 euros en concepto de copia privada, o que supón un 15% sobre o prezo medio de venda destes equipos. Un gravame que só aplican tres países máis na Unión Europea: Alemaña, Austria e Bélxica.
A expensas do que cuantifique a nova lexislación, os centenares de empresas que forman parte de Asimelec consideran que un canon de entre o 3% e o 5% “sería asumible”, a pesar de que suporía unhas perdas para o sector de seis millóns de euros, “cousa diferente sería un imposto do 15%, como parece que acabará sendo”, segundo o seu director xeral, José Pérez.
O responsable de Asimelec critica que o canon dixital “parece que busca un maior afán recadatorio para as entidades de xestión de dereitos de autor”, e puxo como exemplo os elevados beneficios anuais de Cedro (Centro Español de Dereitos Reprográficos) desde que se puxo en marcha o imposto á impresión dixital no ano 1992.
Os fabricantes de impresión dixital apóianse na tese de que tan só un 1% dos fogares españois recoñece copiar algunha vez un libro, “polo que non se pode falar de pirataría con estes equipos”.
Para Asimelec a única forma de acabar con este dano á propiedade intelectual é que o colectivo de autores cambie o modelo de negocio. “Todos queremos axudar á cultura, pero non con afán recadatorio”, dixo Pérez.
Dez euros máis
Se o canon é aprobado segundo as condicións que demandan as sociedades de xestión de dereitos de autor, por unha destas impresoras pagaríanse 10 euros máis, segundo os cálculos de Todoscontraelcanon.es.
Pero este gravame non só vai afectar ás impresoras multifunción, tamén a outros dispositivos tan utilizados hoxe en día como os reprodutores de MP3 (14 euros máis), cámaras dixitais (nove euros máis), regrabadoras de DVD (16,67 euros máis), e reprodutores DVD de salón (6,61 euros máis). No caso do CD virxes, por 200 unidades pagaríanse 50 euros máis, e por 100 DVD virxes, 140 euros.
Todoscontraelcanon.es fai un estudo comparativo dos impostos que se pagarían en varios países de Europa pola adquisición dun iPod de 30GB. Os resultados son os seguintes: Gran Bretaña, cero euros; Alemaña, 2,56 euros; Italia, 9,87 euros; Suecia, 13,5 euros; Finlandia, 15 euros; Austria, 18 euros, e España, 90,6 euros.
