A obra completa do naturalista inglés Charles Darwin (1809-1882) poderá ser consultada en Internet de forma gratuíta nos próximos dous anos. Trátase dun proxecto impulsado por John Van Wyhe, académico da Universidade de Cambridge (sur de Inglaterra).
“A orixe das especies” e o resto de obras de Darwin estarán dispoñibles a través da páxina web www.darwin-online.org.uk. “Unhas 50.000 páxinas de texto e ata 40.000 imaxes de publicacións orixinais serán accesibles simplemente pulsando a tecla do rato”, sinalou un portavoz da universidade británica.
Este portal incluirá ademais cadernos que non foron nunca antes divulgados, como o libro de notas no que Darwin plasmou as súas primeiras impresións en Galápagos, a primeira edición de Diarios “de Investigación: viaxe do Beagle” (1939), “Zooloxía da viaxe do HMS Beagle” (1838-43) e a segunda, terceira, cuarta e quinta edición da “orixe das especies”.
Ademais, a web incluirá a maior bibliografía de Darwin xamais compilada e tamén o maior catálogo dos seus manuscritos, con máis de 30.000 entradas.
Os expertos esperan completar o portal, que actualmente contén só un 50% do material existente, en 2009, cando se cumprirá o bicentenario do nacemento do científico e o 150 aniversario da publicación da teoría da evolución.
