A plataforma Todoscontraelcanon.es, integrada por asociacións de consumidores, internautas, sindicatos e empresas do sector das tecnoloxías da información, reafirmou a súa posición contra este gravame e expresado a súa indignación pola aprobación no Senado, o pasado 24 de maio, do novo texto da Lei de Propiedade Intelectual (LPI).
Ao seu xuízo, a reforma da LPI supón un freo para o desenvolvemento da Sociedade da Información en España. O texto non só mantén o canon dixital compensatorio no CD e DVD, senón que o estende ao resto de soportes dixitais (MP3, ADSL, discos duros…). Trátase dun canon “inxusto e indiscriminado, que encarece a adquisición do produto ou o uso das redes e tradúcese nunha maior dificultade do usuario para acceder aos mesmos”, denuncia a plataforma.
Advirte de que este imposto “pon en clara desvantaxe competitiva ás empresas españolas que ven como os seus produtos se encarecen de maneira considerable nun mercado no que o factor custo é o máis considerado polo consumidor”. Este feito, engade, fai perigar a continuidade destas empresas e máis de 10.000 postos de traballo directos e outros moitos indirectos.
En opinión de Miguel Pérez Subías, presidente da Asociación de Usuarios de Internet (AUI), “dificilmente poderemos abandonar o pelotón de cola se os nosos políticos non entenden que o desenvolvemento da Sociedade da Información non pode basearse en premisas do século XIX e que os cambios tecnolóxicos sempre son unha panca para mellorar o nivel de vida da sociedade no seu conxunto”.
