O prezo das chamadas de teléfonos móbiles no estranxeiro reduciuse nun 60% nos últimos meses, segundo un estudo presentado onte pola Unión Europea (UE), que anunciou a súa decisión de buscar para as tarifas das mensaxes de texto un recorte similar.
Ao referirse ao recorte dos prezos das chamadas desde teléfonos móbiles no estranxeiro, a comisaria europea de Sociedade da Información, Viviane Reding, sinalou que “a eurotarifa é agora o prezo estándar que se ofrece pola itinerancia na UE e esa era a intención do lexislador europeo”. O recorte do 60% está vinculado coa entrada en vixencia o verán pasado desta “eurotarifa”, non superior aos 49 céntimos de euro por minuto para as chamadas efectuadas no estranxeiro e non superior aos 24 céntimos de euro para as chamadas recibidas no estranxeiro, todo iso sen IVE.
A transición dos operadores de telefonía móbil á “eurotarifa” “está a avanzar segundo o planeado”, tal como reflicte un estudo realizado polos 27 reguladores nacionais do sector das telecomunicacións. Bruxelas sinalou onte neste sentido que ata o pasado 30 de agosto “había xa uns 200 millóns de consumidores na UE que se pasaron á ‘eurotarifa’”. Con estes datos como base, pódese calcular con certeza que máis de 400 millóns de cidadáns da UE disporían da protección da nova tarifa a finais de setembro, indicou a CE.
Bruxelas ten previsto agora, e ata finais de 2008, ocuparse das tarifas facturadas polos operadores para as mensaxes de texto e a transferencia de material no estranxeiro. “Insto os operadores de ocuparse da problemática dos prezos elevados das mensaxes de texto”, dixo a comisaria. Se a industria non toma as medidas esperadas, a Comisión Europea proporá reglamentar esas tarifas durante a súa presentación a fins de 2008 dun informe sobre os efectos dos topes nos custos de itinerancia, advertiu a este respecto.
