A venda de música dixital en España rexistrou un incremento do 5% en 2006, segundo Promusicae, asociación que aglutina aos produtores discográficos españois e que representa ao 93% da industria musical. Con todo, este incremento, ao seu xuízo, non compensa a caída das vendas de discos, negocio que parece que deixou de ser rendible.
E é que entre 2001 e 2006 a comercialización de discos en España caeu máis da metade, e mantén un ritmo de descenso imparable que debuxa un futuro incerto para a música non só no noso país, senón en todo o mundo.
Un terzo das compañías que funcionaban no territorio nacional a comezos do novo século pecharon ou ben se fusionaron, e as ao redor de 200 que se manteñen no negocio víronse obrigadas a reducir o seu persoal.
En 2001 vendéronse en España 78,9 millóns de CD, fronte aos 40 millóns de 2006, o que supuxo unha caída da facturación ata case os 345 millóns de euros. Para este ano, as previsións apuntan a un descenso do 15%.
A Asociación de Música en Internet (AMI) afirma que o CD e DVD “teñen os días contados”. Promusicae espera que non cheguen a desaparecer porque cre posible a convivencia entre o soporte tradicional e Internet.
A venda de música dixital en 2006 repartiuse maioritariamente entre tons telefónicos (32%) e “singles” descargados a través do teléfono móbil (31%).
En canto ás descargas de cancións por Internet, baixáronse tres millóns delas de forma legal e 850 millóns a través dos programas de intercambio de arquivos P2P.
