A tenda “en liña” Lik-Sang, dedicada á importación de consolas e todo tipo de accesorios e merchandising relacionado con estes aparellos de Asia a Europa, viuse obrigada a pechar o seu negocio polas demandas presentadas por Sony.
A compañía nipoa denunciou á páxina web afincada en Hong Kong por infrinxir as súas marcas de fábrica, copyright e rexistro de dereitos de deseño ao vender a PlayStation Portable (PSP), a consola portátil de Sony, a clientes europeos, concretamente do Reino Unido.
O Alto Tribunal de Londres finalmente fallou a favor de Sony. Segundo a sentenza, as importacións ao Reino Unido da PSP por parte de Lik-Sang son ilegais.
O fallo caeu como un xerro de auga fría sobre a tenda e os usuarios europeos, que xa fixeran os seus reservas para adquirir a nova máquina de Sony, a PlayStation 3 (PS3), este nadal. A web tivo que cancelar todos os pedidos e disponse a devolver o diñeiro aos clientes.
“Lik-Sang.com non está en disposición de aceptar novos pedidos e anulará e reembolsará todas as ordes existentes que foron tramitadas xa”, sinala a web nun comunicado. “Ademais -engade-, Lik-Sang traballa estreitamente con bancos e PayPal para cancelar os créditos sostidos pola compañía”. Pretende desta forma que ninguén se vexa prexudicado polo peche do seu negocio.
“Protexer aos consumidores”
Sony xustifica as súas accións en que “tratamos de protexer aos consumidores da venda de produtos que non cumpren os estándares europeos de seguridade da Unión Europea debido á diferenza de voltaxes, etc. No caso do PS3 (o modelo que se vai a comercializar en Asia), non é compatible co software do PS1 e PS2 en Europa; non pode reproducir películas en Blu-Ray nin DVD europeos, e non estará cuberta pola garantía”.
Lik-Sang, pola súa banda, sinala que “todas as consolas PSP enviadas estaban en conformidade coas normas de seguridade europeas e distribuíanse con adaptadores de corrente alterna de 110 a 220 voltios que levan o símbolo ‘CE’ e outras marcas de seguridade, e son compatibles en todo o mundo”.
A web vai máis aló e mesmo cita os nomes de altos responsables de Sony en Europa que compraron consolas na tenda “en liña” nove meses antes de que o xigante asiático iniciase as primeiras accións legais, como Ray Maguire, director manager de Sony Computer Entertainment Europe, ou Alan Duncan, director de Mercadotecnia da compañía no Reino Unido.
O fin da importación?
Son moitos os que se preguntan agora se isto pode derivar no fin da importación deste tipo de artigos. O que está claro é que a decisión do tribunal de Londres senta un precedente legal que probablemente será aproveitado por outras empresas, como Nintendo.
E é que estas compañías non están dispostas a perder diñeiro polo mero feito de que os usuarios europeos compren a través de Internet os seus produtos no mercado asiático, moito máis barato que o europeo ou o norteamericano. Así, por exemplo, a PSP e os seus distintos packs resultan unha media de 50 euros máis baratos en Hong Kong que en Europa.
Dáse a circunstancia ademais de que Lik-Sang permitía aos máis impacientes facerse con aqueles produtos -non só consolas, senón tamén videoxogos ou merchandising- que non estaban dispoñibles no mercado europeo, caso do PS3, cuxo lanzamento no vello continente está previsto para maio de 2007, sete meses máis tarde que en Xapón.
