Seguindo o ronsel de Google, a tenda “en liña” Amazon anunciou que permitirá aos seus usuarios comprar libros dixitais. Con Amazon Pages, o nome do novo programa, os usuarios poderán comprar o acceso a calquera páxina, capítulo ou obra completa desde Internet.
Ademais, con Amazon Upgrade os internautas poderán comprar o contido de forma física por un suplemento monetario. “Cremos que, co tempo, isto poderá converterse nun importante negocio para Amazon”, comentou o presidente da compañía, Jeff Bezos.
Os prezos deste servizo variarán segundo a editorial e o libro, pero a maioría custarán uns centavos por páxina. “Un libro que nas librarías custe uns 20 dólares podería facilitarse ‘en liña’ por 1,99 dólares”, asegurou Bezos.
Amazon foi a primeira compañía en permitir procuras dentro de libros en Internet, pero proxectos como “Google Print” relegaron o seu servizo a un segundo plano.
