O iPad 2, a nova tableta informática de Apple, saíu hoxe á venda en Estados Unidos cun prezo similar ao da súa predecesora, 499 dólares o modelo máis sinxelo e ata 829 dólares a versión con 64 Gb con Wifi e conexión de datos 3G. A venda iniciouse a través de Internet á primeira hora da mañá, mentres en tenda a venda comezará a partir das 17:00 horas local en cada estado do país norteamericano. Segundo adiantou Apple, o iPad 2 chegará a España o próximo 25 marzo.
A distribución do novo produto de Apple será maior que no caso do primeiro iPad. Os usuarios poderán acceder a el nos 236 establecementos da compañía estadounidense, 15 máis que co anterior iPad. Tamén estará dispoñible na rede de tendas de Verizon, AT&T, e as grandes superficies Target, Best Buy e Walmart. Apple prevé que as vendas alcanzarán o millón de unidades en menos de 28 días.
O iPad 2 conta coa mesma pantalla de 10 polgadas que o iPad1, aínda que será un 13% máis lixeiro, un 30% máis delgado, o que se traduce nunha mellora substancial da súa portabilidade. Ademais, é un aparello máis rápido na execución das súas funcións, xa que dispón dun novo procesador de dobre núcleo Dual Core A5, de fabricación propia. Entre outras prestacións, inclúe dous cámaras, unha dianteira para realizar a función de videoconferencia FaceTime, e outra traseira para gravar vídeo en definición HD.
