Desde o pasado luns as direccións web están abertas ao uso do chinés, o árabe ou o hindi, o que beneficiará a millóns de usuarios de Internet que non utilizan os caracteres latinos. A Corporación de Asignación de Nomes e Números en Internet (ICANN, nas súas siglas en inglés) anunciou ese día en Exipto a internacionalización do uso destes caracteres nas extensións de Internet e comezou a recibir peticións de diversos países.
“Ata o momento houbo seis peticións en tres linguas distintas”, anunciou o presidente de ICANN, Rod Beckstrom, quen participa no Foro de Gobernación de Internet da Organización das Nacións Unidas (ONU). Das solicitudes, Beckstrom só deu a coñecer dúas, unha de Exipto e outra de Rusia. ICANN aceptará as peticións de representantes de países e de territorios de todo o mundo para novas extensións de Internet que representen o nome do seu país e que sexan feitas en caracteres non latinos. Unha vez que as peticións sexan avaliadas e aprobadas, está previsto que estas extensións cheguen á Rede na maioría dos países durante o ano 2010.
Esta medida abre a porta a idiomas como o chinés, o árabe, o hindi ou o cirílico, entre outros, nos que a partir de mediados de 2010 poderase escribir na barra de dirección do navegador. O día de hoxe é uns “momentos histórico” que axudará, segundo o presidente de ICANN, a alcanzar a idea dunha “Internet con todo o mundo conectado”.
Exipto, un dos primeiros países en rexistrarse, terá un dominio “.masr”, que significa “Exipto” escrito en alfabeto árabe. “Primeiro utilizarase para o Goberno e para o sector académico, logo estudarase que poidan usar este dominio outras organizacións e entidades”, explicou o ministro de Información e de Comunicación tecnolóxica exipcio, Tarek Kamel. Con este lanzamento preténdese “chegar ao maior número de persoas”, dixo Kamel, quen puxo como exemplo aos 55 millóns de exipcios que usan móbiles co teclado en caracteres árabes.
Ata agora só os caracteres latinos eran válidos de modo universal para transformarse nos códigos numéricos das direccións IP coas que se accede a Internet. A decisión de internacionalizar o uso de caracteres non latinos nas direccións web tomouse o pasado 30 de outubro en Seúl durante o cume anual da ICANN.
