As Forzas de Seguridade do Estado poderán rastrexar todas as chamadas telefónicas: a súa orixe, destino, duración e ata as persoas que participen nelas, segundo un proxecto de lei aprobado onte polo Consello de Ministros. As operadoras de telefonía estarán obrigadas a conservar durante un ano os datos xerados en calquera tipo de comunicación electrónica, incluída a que se produza a través Internet. A iniciativa non afecta, aínda así, ao contido das conversacións. Ademais -segundo explicou a vicepresidenta primeira, María Teresa Fernández de la Vega- requirirá “sempre” autorización xudicial.
O Goberno deu por fin un paso anunciado polo anterior ministro do Interior, José Antonio Alonso, pouco tempo despois de asumir o seu cargo. O hoxe titular de Defensa presentou en maio de 2004 un plan de choque contra o terrorismo no que se avogaba por este tipo de medidas. O motivo non era outro que o destacado papel que tiveron os teléfonos móbiles nos atentados do 11-M. Os terroristas utilizáronos para activar as bombas que estalaron nos trens e a policía tivo serias dificultades para identificar os seus titulares porque todos levaban cartóns prepagamento e non de contrato.
Unha vez que o texto sexa aprobado polo Parlamento esixirase ás operadoras que rexistren nun libro a identidade de quen adquiran estes cartóns. A lei concederalles un prazo de tres meses para realizar as adaptacións técnicas necesarias. O que non está determinado, neste caso, é durante canto tempo deberán gardar os datos. Fernández de la Vega subliñou que o “Goberno é consciente de que debe manterse sen diminución o dereito á intimidade”. Ao seu xuízo, a iniciativa servirá para incrementar a eficacia na prevención de delitos e a obtención de probas xudiciais contra bandas terroristas e organizacións criminais.
