A Asociación de Distribuidores e Importadores Videográficos de Ámbito Nacional (ADIVAN) e Produtores de Música de España (Promusicae) recorreron o auto de sobresemento e o arquivo decretado polo xuíz Eduardo de Porres sobre o caso Sharemula.com.
Ao seu xuízo, a decisión do maxistrado “non crea precedente xurídico se se teñen en conta as 22 causas abertas contra páxinas web que, en todos os casos, están a levar adiante a instrución, consideradas polo momento delito polos xuíces que as tramitan”.
ADIVAN e Promusicae lembran que, en febreiro, un auto da Audiencia Provincial de Madrid recoñeceu a existencia de ánimo de lucro e, por tanto, indicios de delito na actividade da páxina Todoalbums.net, similar a Sharemula.com.
O recurso interposto indica que existe ánimo de lucro na actividade desta web “ao promover vínculos que se comparten arquivos de obras intelectuais sen o consentimento do ou dos propietarios lexítimos dos dereitos”.
O auto de Porres dicía que os responsables de Sharemula.com “non realizan de forma directa actos de comunicación pública de obras protexidas pola LPI (Lei de Propiedade Intelectual), xa que non aloxan nos seus arquivos os títulos descargados”.
