O tempo que Google mantén almacenados os datos persoais identificables dos seus usuarios será reducido, segundo anunciou o propio motor de procuras, que pretende así atender os requirimentos da Unión Europea en canto a políticas de privacidade.
Desta forma, o tempo que se almacenan estes datos quedaría en 18 meses, un período máis baixo que o proposto en marzo, cando Google suxeriu un prazo de entre 18 e 24 meses. Calquera petición de manter os datos menos de 18 meses prexudicaría os servizos do buscador, segundo afirmou nun comunicado Peter Fleischer, conselleiro de privacidade de Google. “Tras considerar as inquietudes do Grupo de Protección de Datos, anunciamos unha nova política: que os rexistros do noso servidor de procuras sexan anónimos tras 18 meses”, dixo Fleischer.
Cada vez que un usuario de Google busca en Internet, a compañía reúne información sobre os gustos, intereses e crenzas do consumidor, que logo podería ser utilizada polos anunciantes. Coa medida anunciada, Google está a tratar de eliminar as dúbidas dos reguladores en Europa e Estados Unidos, así como de grupos activistas que consideran que o alcance dos seus servizos supón ameazas sen precedentes á privacidade dos consumidores.
