A nova versión de Google Maps para o teléfono móbil vén cunha nova aplicación que permite localizar xeograficamente a amigos. Latitude, que así se chama esta ferramenta, é capaz de situar de forma automática a todos os contactos sobre un mapa empregando tecnoloxías diversas como GPS ou a conexión Wi-Fi máis próxima.
O responsable de produtos para móbiles de Google, Hugo Varra, explicou a través dunha videoconferencia desde Londres que Latitude “vén responder a unha cuestión moi habitual nas chamadas da xente, Onde estás?”.
Segundo Barra, non se trata dunha ferramenta “de control”, senón de socialización “”. Como exemplos de uso de Latitude puxo localizar amigos nun evento multitudinario, como pode ser un festival de música, ou quedar de forma espontánea con alguén que estea preto.
A localización é “aproximada” e, dependendo do terminal, da cobertura ou de se o usuario está en movemento ou nun sitio fixo, actualízase nun intervalo de tempo que oscila entre o tres e os 40 minutos.
Respecto da privacidade, Barra dixo que se tivo moi en conta á hora de deseñar esta aplicación e por iso ofrece numerosas opcións de configuración. Así, só funciona se o usuario acepta ser localizado.
Latitude pódese descargar desde a páxina www.google.com/latitude no navegador do móbil. Funciona exclusivamente en teléfonos intelixentes de alta gama que teñan instalado o sistema operativo Windows Mobile ou Symbian S60. Nas próximas semanas tamén estará dispoñible para iPhone e Android, e máis adiante sairá unha versión para portátiles.
