Desenvolvedores de Google proban un novo sistema que permitirá aos usuarios iniciar a sesión nas súas contas Google mediante códigos QR. Os usuarios non terán que escribir o seu nome de usuario e contrasinal, senón que tras escanear este código co seu smartphone serán redirixidos a un sitio web de acceso móbil.
Unha das preocupacións máis importantes para Google, como para moitas outras compañías, é a seguridade dos usuarios. O feito de que estes accedan ás súas contas desde sitios seguros sen posibilidade de que as súas contas se vexan afectadas por terceiros supón un traballo primordial para os enxeñeiros de Google. Por iso, traballan na actualidade nun proxecto polo que a través dun sistema de códigos QR, os usuarios poidan iniciar sesión nas súas contas de Google de forma segura.
Con esta nova forma de inicio de sesión, os usuarios poden utilizar smartphones con sistema operativo Android para escanear un código QR nun escritorio que automaticamente lles levará a un sitio web de acceso móbil. De acordo co enxeñeiro de Google Walter Chang, os usuarios poden iniciar sesión nun servizo de Google no seu propio dispositivo e directamente serán redirixidos a Gmail ou iGoogle nun computador público. No entanto, Chang admite no seu perfil de Google+ que códigos QR falsos poden facerse pasar como un código auténtico de acceso a Google, o que podería supor un risco para a seguridade dos usuarios.
Por iso, desde Google traballan para superar estes inconvenientes, razón pola que este sistema se atopa en probas. Algúns usuarios puideron probar o sistema esta semana por unhas horas, pero Google pechou a páxina de proba para poder investigar. “A pesar de que concluíu este experimento en concreto, estamos constantemente en probas con novos mecanismos de autenticación para que sexan máis seguros”, asegura Dirk Balfanz, outro dos enxeñeiros do proxecto.
