As compañías Sony, Panasonic e Samsung acordaron, xunto co fabricante XpanD, un pacto que posibilite a creación dun estándar de lentes 3D activas. Este tipo de tecnoloxía permite a visualización de imaxes cunha calidade de imaxe Full HD e proporciona aos usuarios maior comodidade porque funcionan mediante Bluetooth ou infravermellos.
O novo modelo de lentes 3D poderase utilizar en reprodutores de calquera destas marcas e estará dispoñible no mercado a partir de 2012, aínda que tamén serán compatibles cos modelos de televisores de 2011. A diferenza entre os televisores normais e os activos radica en que mostran unha imaxe diferente para cada ollo, mediante a emisión dun sinal ás lentes que alterna a emisión de imaxes en cada ollo a gran velocidade.
O pacto selado entre estas compañías potenciará o desenvolvemento e a concesión de licenzas de radio frecuencia para o sistema de lentes activas 3D. Ademais, o acordo tamén inclúe o establecemento de protocolos de funcionamento das lentes en diferentes soportes 3D, como televisores, computadores ou proxectores.
“Esperamos que a iniciativa de estandarización 3D supoña unha contribución significativa para acelerar o crecemento de produtos relacionados co 3D”, explica Masayuki Kozuk de Panasonic. O pacto comercial entre estas compañías evidencia unha clara aposta polo desenvolvemento da tecnoloxía 3D activa que, segundo o Grupo NPD, acaparou o 96% do mercado televisivo en 3D de Estados Unidos durante este ano.
