A Corporación de Internet para a Asignación de Nomes e Números (ICANN) aprobou os novos dominios rexionais, corporativos e institucionais. Desta maneira, aos dominios “.es” ou “.com” poderíanse unir os nomes de cidades ou empresas, entre outros. O organismo regulador que supervisa os nomes de dominios de Internet acordou así pór fin á restrición dos dominios como “.com” ou “.org”.
ICANN recibirá as solicitudes de novos nomes a partir do 12 de xaneiro do próximo ano, aínda que se prevé que as primeiras aprobacións chegarán a finais de 2012. Os novos nomes de dominios non se limitan a caracteres latinos escritos polos usuarios das linguas de Europa occidental como inglés e español, senón tamén outras linguas, algo que beneficia aos usuarios doutros idiomas como o chinés e o ruso.
O programa aprobouse por 13 votos contra un, con dúas abstencións da xunta directiva da corporación nunha reunión en Singapura. “Hoxe fixemos historia. É o amencer dunha nova era. O sistema de direccións de Internet acaba de ser aberto”, apuntou o presidente e CEO de ICANN, Rod Beckstrom, nunha conferencia de prensa. Os analistas aseguran que as empresas serán os primeiras en rexistrarse, o que quere dicir que os primeiros nomes de dominio serán de marcas como Toyota, Apple ou Coca-Cola.
A medida considérase como unha gran oportunidade para as marcas porque lles permitirá gañar máis control sobre a súa presenza en liña e dirixir aos usuarios de forma máis fácil e rápida a calquera das súas páxinas web. No entanto, podería ser un perigo para quen non aproveiten esta posibilidade. Adoptar un novo domino custará 185.000 dólares, aínda que antes as persoas ou organizacións terán que demostrar un dereito lexítimo ao uso do nome que desexan comprar.
Na actualidade, só están dispoñibles 22 dominios gTLD rexistrados no mundo, como “.com”, “.org”, “.info”, etc. Ademais, existen máis de 250 países con dominios propios como Reino Unido (“.uk”) ou España (“.es”). Despois do cambio espérase que se poidan utilizar moitos máis gTLD. Ademais, dominios como “.nyc”, “.london” ou “.fastfood” poderían ofrecer oportunidades para moitas empresas máis pequenas para coller os nomes que xa non están dispoñibles no nivel de .com “” ou similares.
