A fría acollida a Windows 8 por parte dos consumidores fixo reformularse as cousas a Microsoft, a empresa que fundase Bill Gates fai xa case 40 anos. Na actualidade, Windows 8 ten un 12% de cota de mercado fronte ao 52% de Windows 7, o seu anterior sistema operativo. Esta reticencia dos usuarios ao cambio acelerou o desenvolvemento dunha nova versión máis acorde ás súas peticións e preferencias e, á vez, pensada para o sector empresarial, que é o que na actualidade compra ordenadores. Con todo, Windows 10 -Microsoft sáltase a denominación Windows 9– tamén se poderá aplicar a móbiles e tabletas, adaptándose ás especificidades de cada aparello. Aínda que o seu lanzamento comercial será dentro dun ano, xa se coñecen algunhas das súas características como se explica a continuación.
Acada de presentarse o avance do que será a nova versión do sistema operativo Windows: Windows 10. Cando se daba por feito de que se chamaría Windows 9, Microsoft decidiu utilizar un número máis redondo, máis relacionado co éxito e os fitos. Desta forma, a empresa de Redmond tamén quere pór terra polo medio coa mala fama de Windows 8.
Windows 10 non é unha evolución do actual sistema operativo, senón un produto por completo novo
A nova versión non é unha evolución do actual sistema operativo, senón un produto por completo novo. Microsoft quere que os usuarios de Windows 7 que rexeitaron instalar Windows 8 nos seus computadores salten directamente a Windows 10. Para iso, a un ano vista xa quentou o mercado cunha presentación. Entre outras declaracións, Microsoft aposta por que a nova versión sexa un produto de colaboración entre os seus usuarios.
Unha versión para todos
Windows 10 será a primeira versión de Microsoft que unifica todos os sistemas operativos dispoñibles pola compañía na actualidade: teléfonos móbiles, tabletas e computadores. Tamén o fai en servidores e na “nube”. Desta forma, Windows Phone desaparecerá coa chegada de Windows 10 na súa versión para dispositivos móbiles.
A idea é que os desenvolvedores poidan crear aplicacións que poidan funcionar en todo tipo de dispositivos e pantallas de diferente tamaño e gobernados polo novo sistema operativo. Esta unificación tamén traerá unha única tenda de apps incluída en Windwos, onde estas serán universais. É dicir, en teoría, deberán funcionar tanto en equipos de escritorio como en teléfonos móbiles.
Volta ao menú clásico
Unha das novidades de Windows 10 é unha das características máis coñecidas polos usuarios de computadores persoais: o menú de inicio clásico. Microsoft tentou matalo nas primeiras versións de Windows 8, pero tivo que recuperalo nas actualizacións do sistema operativo debido ás queixas dos consumidores.
Microsoft tamén tivo en conta os dispositivos con pantalla táctil. Por iso, Windows 10 terá algunhas opcións para poder interactuar co sistema desde a pantalla. Desta forma, os usuarios de equipos híbridos poderán utilizalo coma se fose unha tableta. Windows 10 detectará se o soporte no que é instalado ten ou non pantalla táctil e, en función diso, activará unha versión ou outra.
Doutra banda, Windows 10 incorporará unha nova característica denominada “Task View”, que permitirá ter activos e organizar diferentes escritorios nunha mesma sesión. Deste xeito, segundo o uso que se lle dea ao computador nun momento determinado, ou da persoa que o utilice, poderase escoller o escritorio. Esta é unha estratexia similar á que xa incorporan os sistemas operativos Mac OS X, nos computadores de Apple, e Linux.
Recuperar o mercado empresarial
Un nicho de mercado importante para Microsoft é o empresarial. Moitas compañías de diferente tamaño non emigraron a Windows 8 desde Windows 7 debido a distintas incompatibilidades, tanto a nivel de hardware como de software.
Nas contornas corporativas, o salto de Windows XP a Windows 7 foi demasiado traumático
Nas contornas corporativas, o salto de Windows XP a Windows 7 foi demasiado traumático como para pasar a Windows 8 e o seu radical cambio de contorna gráfica respecto das versións precedentes.Este salto implicaba un gran esforzo en horas de persoal especializado e tamén económico, dado que, polos requisitos de maquinaria de Windows 8, con frecuencia a súa instalación implicaba a compra de novos equipos informáticos.
Con Windows 10, Microsoft quere que as empresas poidan realizar a migración de forma máis sinxela das aplicacións empresariais e das diferentes políticas de seguridade.
En novembro Microsoft dará máis información
Nunha primeira aproximación a Windows 10, Microsoft tentou centrarse no mercado empresarial e anunciou unhas poucas de funcionalidades pensadas para este nicho. Pero nos próximos meses, irá adiantando novas características orientadas aos consumidores finais, como o asistente de voz, o novo sistema de procuras integrado con Bing ou a renovación dalgunhas das súas aplicacións estrela, como Skype ou Microsoft Office.
Segundo ZDNet, Microsoft dará máis detalles sobre Windows 10 nun evento para desenvolvedores o 12 de novembro en Nova York. Con todo, Windows 10 non estará dispoñible no mercado ata finais de 2015, aínda que os desenvolvedores de aplicacións de terceiros xa contan coa primeira versión técnica. En febreiro de 2015 está prevista unha nova versión do sistema.
