Os invidentes que teñan acceso a un computador poderán agora ter total independencia á hora de ler grazas a Tiflolibros “”, a primeira biblioteca virtual paira cegos de fala hispana creada por un grupo de mozos arxentinos. O proxecto, iniciado hai catro anos, foi crecendo até converterse nun valioso arquivo virtual cuns 7.200 libros dixitalizados que consultan uns 900 usuarios duns 30 países.
“Todo naceu en novembro de 1999, cunha lista de correo electrónico paira intercambio de libros. Ao principio eramos 20 persoas de Buenos Aires, pero despois, grazas ao traballo conxunto, chegouse á biblioteca que é hoxe”, dixo onte o creador de “Tiflolibros”, Pablo Lecuona, un mozo cego estudante de Comunicación Social.
A biblioteca aliméntase coa achega dos propios usuarios, de escritores que se solidarizan co proxecto e das editoriais, que facilitan copias xa dixitalizadas das súas publicacións.
Entre os selos editoriais que contribúen están Planeta, o grupo Alfaguara-Taurus-Aguilar, o Fondo de Cultura Económica e Edicións Don Bosco e San Pablo.
Os textos orixinais en papel dixitalízanse, pásanse por un lector óptico de caracteres (a imaxe transfórmase en letras e espazos) e, logo, sométese a información a un programa de lectura de pantalla, mediante o cal una voz electrónica fai audible o texto.
Paira acceder á biblioteca hai que rexistrarse no sitio web “www.tiflolibros.com.ar” e acreditar a condición de discapacidade visual.
