O móbil converteuse nun elemento imprescindible para moitos discapacitados. Un estudo da Universidade de Deusto (Bilbao) revela que o 90% deste colectivo úsao habitualmente. Na maioría dos casos porque lles dá seguridade (43%), facilítalles a comunicación (28%) e por motivos laborais (18%).
Este traballo, que leva por título “Uso da Telefonía Móbil por parte da Poboación con Discapacidade en España”, identifica as áreas de mellora desta tecnoloxía para o colectivo de discapacitados, e recolle ideas, servizos e aplicacións accesibles dirixidas a mellorar a súa calidade de vida e favorecer a súa autonomía e integración.
En concreto, a penetración da telefonía móbil nos colectivos de persoas con discapacidade auditiva, física e visual é do 95%, porcentaxe moi próxima á media nacional (de algo máis do 100%). No caso da discapacidade intelectual, o 75% dos afectados usan móbil. Pola súa banda, os discapacitados visuais son os que máis utilizan o celular (o 65% todos os días), seguidos dos que presentan algunha discapacidade física (54%) e auditiva (54%).
As persoas con discapacidade visual ou física utilizan o móbil tanto para realizar chamadas como para escribir e recibir mensaxes (64% e 79%, respectivamente).
Para os xordos, este dispositivo supuxo a posibilidade de comunicarse de forma sinxela a través de mensaxes SMS (46%). Mentres que os discapacitados intelectuais utilízano fundamentalmente para facer chamadas (53%).
