O Banco de España puxo en marcha unha oficina virtual de reclamacións a través da cal os cidadáns poderán presentar consultas e queixas sen necesidade de desprazarse fisicamente ata unha sucursal da institución.
Segundo informa o banco nun comunicado, a Oficina Virtual do Servizo de Reclamacións consta dunha zona pública, onde os usuarios de produtos bancarios poderán realizar consultas sobre cuestións que poidan xurdir nas súas relacións coas entidades financeiras, e dunha zona privada, que permitirá a presentación dunha reclamación ou queixa contra unha entidade concreta, así como realizar o seguimento do expediente de reclamación, mediante a consulta do estado de tramitación do mesmo.
Para acceder á zona privada é necesario darse de alta como usuario previamente na zona pública, así como posuír o DNI electrónico ou outros sistemas de firma electrónica avanzada que o Banco de España teña recoñecidos.
A institución financeira afirma que coa apertura desta oficina segue avanzando no seu obxectivo de facer máis accesibles os seus servizos ao público e completa o proceso iniciado fai catro anos polo Servizo de Reclamacións ao abrir a posibilidade de realizar consultas por correo electrónico e reforzar o servizo de atención por vía telefónica.
