O próximo ano chegará ao mercado o esperado cargador único para todos os modelos de teléfono móbil, segundo o compromiso alcanzado pola industria e que foi presentado onte á Comisión Europea.
O dez fabricantes que copan o 90% do mercado comprometéronse a comercializar este cargador para pór freo á xeración de miles de toneladas de residuos electrónicos “innecesarios” cada ano, explicou Gunter Verheugen, vicepresidente do Executivo comunitario.
“Cada vez que se compra un teléfono móbil, un produto cunha vida curta, o consumidor recibe un novo cargador, que vai acumulando en gran cantidade”, afirmou Verheugen. Bruxelas ameazara o ano pasado aos fabricantes con converter o cargador único nunha obrigación legal.
O novo aparello funcionará mediante tecnoloxía USB e será compatible con ao redor do 50% dos teléfonos xa existentes, que dispoñen da tecnoloxía de transferencia de datos. O resto requirirá un adaptador. O produto virá acompañado ademais dunha nova norma europea que garantirá a súa seguridade.
Verheugen non ocultou o seu desexo de estender o cargador único a outros produtos electrónicos, como ordenadores portátiles ou cámaras fotográficas. “O que me gustaría é que en poucos anos o mesmo cargador fose compatible con todos os aparellos electrónicos dunha persoa”, dixo o vicepresidente da Comisión, quen recoñeceu que se trata dunha tarefa “complicada” por razóns técnicas e de seguridade.
