O Goberno central será quen finalmente decida a listaxe de aparellos e equipos suxeitos ao canon dixital e a contía do mesmo, tras pecharse onte sen ningún acordo a última reunión entre a industria das novas tecnoloxías e as entidades de xestión de dereitos de autor. Os ministerios de Cultura e Industria deberán establecer este gravame mediante unha orde ministerial que non poderá tardar máis de tres meses e que terá validez durante os próximos dous anos.
Termina así un proceso de diálogo que comezou o 11 de setembro por mandato da Lei de Propiedade Intelectual (LPI), que establece un sistema de negociación para acordar o pago da denominada “compensación por copia privada”.
José Pérez, director da Asociación Multisectorial de Empresas Españolas de Electrónica e Comunicacións (Asimelec), recoñeceu que fora imposible chegar a un acordo. Parece que prefiran “un mal pacto a un bo preito”, recriminou aos xestores.
Pola súa banda, Antonio Guisasola, presidente dos Produtores de Música Españois (Promusicae), precisou que “aínda que formalmente a negociación está pechada”, todas as partes emprazáronse para “tratar de reconducir o asunto”.
Nesta liña, Abel Martín, director de Artistas, Intérpretes, Sociedade de Xestión de España (AISGE), dixo que a súa intención é a de atopar un acordo conxunto, “porque sempre é máis fácil o cumprimento se o pactaches que se cho impoñen. É mellor un mal acordo que unha boa orde ministerial”.
Mentres tanto, a Asociación de Compositores e Autores de Música (ACAM) instou ao Ministerio de Cultura, ao de Industria e ao Goberno a aplicar o canon dixital nos reprodutores de MP3 e nos teléfonos móbiles.
