A ministra de Ciencia e Tecnoloxía, Anna Birulés, anunciou onte no Senado que o Goberno está a ultimar un plan que permitirá que, en menos de dous anos, os habitantes de zonas de difícil acceso poidan conectarse a Internet e a todos os servizos da Sociedade da Información.
Anna Birulés inaugurou onte coa súa comparecencia a Comisión Especial do Senado sobre a situación das poboacións de alta montaña e informou de que o Goberno xa ten redactadas as principais liñas do plan paira substituír as 255.000 liñas trac (combinación de tecnoloxía móbil e fixa) que se instalaron nos anos 90 paira levar a telefonía ás zonas da xeografía de máis difícil acceso.
Asociacións de usuarios
Tras coñecer o anuncio de Birulés, as asociacións de usuarios sinalaron que este plan é necesario e é una obrigación do Goberno ofrecer este servizo. Segundo Víctor Domingo, presidente da Asociación de Internautas (AI), “o Executivo non esta dando nada do outro mundo, senón cumprindo co compromiso de que Internet é un servizo universal”.
Domingo lamentou que aínda haxa que esperar dous anos paira poder acceder a Internet desde estas zonas e lembrou que mentres existan estas lagoas non se pode seguir falando do Plan Info XXI ou de “e-Europe”.
Pola súa banda, o presidente da Asociación de Usuarios de Internet (AUI), Miguel Pérez Subías, explicou que os operadores non están moi interesadas neste servizo porque as perspectivas de negocio non son altas, polo que opina que é fundamental que a Administración o promova de forma destacada.
Pérez Subías valorou a achega de fondos europeos paira desenvolver este proxecto e considerou que o prazo de dous anos é bastante realista, aínda que dixo que sería mellor que fose máis curto.
