A plataforma Lleida.net presentou no Congreso Mundo Internet 2007, que se celebra estes días en Málaga, unha nova aplicación chamada “Checker” que indica se un número de móbil existe ou non.
“Checker” é unha ferramenta “en liña” que funciona introducindo o número de teléfono que queremos consultar, e a continuación nos índica se está activo ou non. Desta forma, as empresas que empregan grandes volumes de mensaxería ou chamadas no seu traballo diario, poderán aforrar en custos ata un 20%, xa que as bases de datos que se manexan poden supor que o 20% de números xa non existan.
“Empregando este servizo, todas aquelas empresas con conexións dedicadas ás operadoras ou que utilizan grandes volumes de mensaxería ou chamadas, poden evitar os custos suplementarios do rutado defectuoso das mensaxes, das súas chamadas de voz e evitar enviar calquera tipo de mensaxe a números ou redes que non existan ou que non estean activos”, sinala Sisco Sapena, director executivo de Lleida.net.
Trátase do primeiro servizo que permite centralizar a información sobre a actividade ou inactividade dos números de teléfonos móbiles dispoñibles en España, independentemente da operadora á que pertenzan. Ademais, está ao alcance de calquera tipo de usuario, desde particulares a empresas.
