A guerra entre os novos formatos de DVD de alta definición, Blu-Ray e HD DVD, expón dúbidas para a empresa londiniense de estudos de mercado Screen Digest, que asegura nun informe que “o resultado neto da guerra de formatos e a publicidade que xerou será daniño para o apetito do consumidor”.
A batalla podería terminar sen un vencedor claro ao confundir aos consumidores e facer que moitos deles simplemente esquezan as novas tecnoloxías, segundo os expertos desta compañía. Así, só 11.000 millóns de dólares do total de 39.000 que se espera que mova este mercado en 2010 en Estados Unidos, Europa e Xapón procederá dos formatos de alta definición, apunta o informe.
A cinta de vídeo VHS foi substituída polo formato DVD grazas a que se trataba dun único formato. “Esta vez ambos os formatos teñen características similares”, comentou Graham Sharpless, autor do estudo, que cre que isto representará un problema para a industria. Para Screen Digest, ambos os formatos coexistirán ata que chegue unha solución combinada rendible, de modo que non haberá un que se impoña.
Os grandes estudos de Hollywood e a nova xeración de consolas son dúas das posibles claves desta guerra de novos formatos. Os primeiros decantáronse, na súa maioría, por Blu-Ray, salvo Universal, aínda que varias optarán, nun primeiro momento, por lanzar as películas en ambos os formatos. Pola súa banda, Microsoft deu o seu apoio ao HD DVD, especialmente co seu novo sistema operativo, Windows Vista, e coa súa consola, Xbox 360, que xa conta cun lector externo neste formato. Mentres, Sony, compañía que promove o Blu-Ray, incorporará este formato na nova Playstation 3, que sairá a finais de ano.
Screen Digest afirma que no ano 2010 haberá 15 millóns de fogares en Estados Unidos, 10 en Europa e 2,5 en Xapón que se pasaron á alta definición, pero non ten tan claro que formato será o máis estendido.
