Un total de 11 operadores participarán na poxa convocada polo Ministerio de Industria, Turismo e Comercio na que se licitarán 270 MHz de espectro radioeléctrico nas bandas de 800 MHz (dividendo dixital), 900 MHz e 2,6 Ghz. Os operadores admitidos na poxa son Telefónica, Vodafone, France Telecom España (Orange), Cableuropa (ONO), Jazz Telecom, Euskaltel, Telecom Castela-A Mancha, R Cable e Telecomunicacións Galicia, Telecable de Asturias, Obras Públicas e Telecomunicacións de Navarra (OPNATEL), Consorcio de Telecomunicacións Avanzadas (COTA).
Co outorgamento destas concesións de frecuencias porase a disposición dos operadores todo o espectro dispoñible. Industria persegue con iso impulsar novos investimentos en redes de acceso inalámbrico, incrementar a cobertura de servizos de banda ancha en mobilidade en zonas rurais, co que se reducirá a “fenda dixital”, e fomentar a innovación e a competencia no sector. Ademais “a recadación obtida permitirá aumentar os ingresos do Tesouro Público”, sinalou o departamento dirixido por Miguel Sebastián.
Os 270 MHz que se poxarán dividíronse en 58 bloques, con ámbitos xeográficos distintos que inclúen tanto os estatais como os autonómicos. Cada un dos bloques ten un prezo de saída, que será o mínimo valor das poxas para ese bloque na primeira rolda da poxa. En conxunto, o prezo de saída de todos os bloques poxados é de 1.453 millóns de euros. Os bloques máis caros son os pertencentes á banda de 800 MHz, cun prezo de saída de 170 millóns, seguidos dos da banda de 900 MHz, por 169 millóns de euros, e dos da banda de 2,6 Ghz, que ten un prezo que de 10 millóns, no caso dos bloques de 2×10 MHz, e de 5 millóns, para os bloques de 2×5 e de 10 MHz TDD.
Todos os operadores de telecomunicacións puideron presentarse á poxa sen limitación algunha, coa única excepción de non exceder o límite máximo de espectro radioeléctrico establecido para cada un deles, de 2×20 MHz nas bandas de 1.800 MHz e de 115 MHz nas bandas de 1.800 MHz, 2.100 MHz e 2,6 Ghz. Ademais, e co fin de evitar a especulación co espectro, establécese a prohibición da súa venda durante os dous anos seguintes á súa dispoñibilidade.
Coa poxa que se iniciará antes do 30 xuño, completaranse as licitacións de espectro radioeléctrico planificadas por Industria, que xa resolveu os concursos convocados para o outorgamento dunha concesión de espectro radioeléctrico na banda de 900 MHz e de tres concesións na banda de 1.800 MHz. Industria destacou que os adxudicatarios de ambos os concursos realizaron unha forte aposta polo despregamento de infraestruturas de comunicacións móbiles. Entre os dous comprometeron uns investimentos de 733 millóns de euros, unha cifra moi superior aos 186 millóns de euros esixidos polo prego. Ambos efectuaron, ademais, achegas directas ao Tesouro Público que suman 168 millóns de euros.
