A presión urbanística está a superar a capacidade de carga dos municipios do litoral mediterráneo e das illas e minguando a competitividade duns destinos nos que o crecemento ilimitado de aloxamentos residenciais pon en perigo o que é o motor de creación de riqueza e emprego: o turismo. Esta é a conclusión dun informe presentado onte pola Alianza para a Excelencia Turística (Exceltur), que identifica 45 municipios turísticos na costa mediterránea e as illas que rexistran niveis de edificación próximos ou superiores aos das grandes cidades españolas.
Este traballo sostén que os espazos de sol “e praia” empezan a verse acantoados cada vez máis polo cemento e o que é peor, que esta deterioración non resultou indiferente aos visitantes estranxeiros, que son cada vez máis esixentes e teñen máis sitios onde elixir, grazas á aparición de novos destinos internacionais máis baratos e ás aerolíneas de baixo custo. “Esta crecente masificación da costa, percibida polo 77% dos turistas enquisados que viaxaran máis de catro veces ao mesmo destino, está a provocar un descenso da rendibilidade do tecido socioeconómico localizado nos destinos, polo efecto fuxida que está a xerar sobre algúns dos turistas que realizan o maior gasto”, indica o informe.
Panorama preocupante
Pero a curto prazo o panorama é aínda máis preocupante. Exceltur advirte que os territorios afectados teñen chan cualificado para triplicar os niveis de urbanización actuais, o que elevaría a súa capacidade de aloxamento desde os 13,6 millóns de persoas actuais a 40 millóns. E iso que 14 municipios xa presentan niveis de construción superiores aos das grandes cidades (máis de 19.000 persoas por quilómetro cadrado en chan urbano) e outros 31 están moi preto (entre 15.000 e 19.000 persoas).
O informe achaca a elevada densidade urbanística á construción desde 1991 ata 2003 de 1,2 millóns de prazas de aloxamento residencial de uso turístico non regulado pola Administración, que sitúan a oferta nos municipios do litoral mediterráneo e nas illas en 12 millóns de prazas, fronte a pouco máis de 1,6 millóns nos establecementos regulados.
Exceltur considera imprescindible a aplicación dun novo modelo de desenvolvemento turístico e inmobiliario para atallar a perda de competitividade do sector e a súa menor contribución ao crecemento económico. Neste sentido, aposta por impulsar iniciativas que atraian a un turismo de maior “calidade”, que achegue máis diñeiro e xere máis emprego estable a longo prazo. Ademais, insiste en que os plans de ordenación deben preservar as zonas turísticas do crecemento residencial, adaptando o ritmo de construción á capacidade dos territorios.
