A Consellería de Innovación e Industria da Xunta de Galicia destinará 578.000 euros a mellorar e recuperar o patrimonio relixioso da Ruta da Prata ao seu paso pola provincia de Ourense, pola que cruza en diagonal o Camiño de Santiago. Así consta no protocolo de colaboración asinado onte polo conselleiro Fernando Branco e o Bispo de Ourense, Luís Quinteiro.
En concreto, durante o que queda de ano, Innovación e Industria realizará unha intervención para finalizar a restauración do retablo do Calvario da Igrexa de Santa María do Canizo, na localidade de Gudiña; a rehabilitación da ermida de Herosa, tamén en Gudiña; a restauración do retablo maior da Igrexa de Santa María de Riós, e finalizará a drenaxe e a pavimentación exterior e a renovación da instalación eléctrica da Igrexa de San Estevo, en Sandiás, así como a rehabilitación do coro de leste mesmo templo.
Ademais, a Consellería acometerá, en colaboración co Bispado de Ourense, os traballos de restauración do retablo maior da igrexa do mosteiro de San Salvador de Celanova e a rehabilitación das capelas de Vilarnaz, en Coles e Sabuguido, en Vilariño de Conso.
Uso dos albergues
Na súa intervención tras a firma do protocolo, Fernando Branco sinalou que no horizonte do Ano Santo 2010 é indispensable a recuperación da Vía da Prata, onde a utilización dos albergues experimentou unha subida do 22% entre xaneiro e abril deste ano.
O conselleiro engadiu que, segundo un estudo realizado polo seu departamento, o Xacobeo 2010 suporá “entre o 0,3% e o 0,5%” do Produto Interior Bruto (PIB) de Galicia ese ano, e por iso o seu obxectivo é lograr que exista “un albergue por cada 25 quilómetros de percorrido” na Vía da Prata.
Neste sentido, Branco apuntou que a Xunta investirá 2,9 millóns de euros en acondicionar varios tramos do Camiño de Santiago.
