Os antigos administradores de Air Madrid presentaron ante o Xulgado de Instrución número 5 de Madrid un convenio polo que só se ofrecen a pagar a totalidade do seu billete a aqueles pasaxeiros afectados que non chegaron a voar tras a suspensión de operacións da compañía.
Air Madrid “pagará a totalidade dos créditos ordinarios orixinados polo pago de billetes de voos programados a partir do día 15 de decembro de 2006 e que non foron realizados”, indica o documento.
Así, a proposta exclúe a aqueles afectados que foron recollidos por outras aerolíneas, como os voos fretados por Fomento, gobernos de países afectados ou os realizados por Air Comet. Os restantes créditos, correspondentes a provedores e o resto de acredores, serán satisfeitos cunha “redución ou quita” da metade do importe cumprindo uns prazos.
Doutra banda, os antigos xestores expoñen a creación dunha Comisión de Vixilancia coa finalidade de garantir “a transparencia e o cumprimento das obrigacións da debedora”.
Informe patrimonial
En relación ao caso Air Madrid cabe mencionar tamén que o titular do Xulgado do Mercantil número 5 de Madrid, Alberto Arribas, interrompeu o prazo de entrega do informe patrimonial da compañía. Arribas aceptou a solicitude realizada pola propia administración concursal debido á situación “de forza maior” provocada polo elevado volume do concurso.
Deste xeito, o xuíz obriga ao tres administradores concursais a informar, no primeiros cinco días de cada mes, sobre as circunstancias relevantes para valorar o cesamento ou o mantemento da interrupción.
En total, segundo a administración concursal, recibíronse 77.000 escritos de comunicación de créditos, aínda que a cifra final de acredores podería ser maior xa que moitos deles preséntanse de forma conxunta.
A Organización de Consumidores e Usuarios (OCU), pola súa banda, dixo que pedirá unha fianza de entre 500.000 e 600.000 euros para que o presidente de Air Madrid, José Luís Carrillo, e tres dos seus directivos poidan seguir en liberdade. A xuízo de OCU, esta cantidade é acorde co delito de estafa que se lles imputa.
