ASDETOUR anima aos consumidores a denunciar os atrasos e o “overbooking”

• Autor: Por mediatrader
• Data de publicación: Luns, 28deXullode2003

A Asociación para a Defensa do Turismo (ASDETOUR) anima aos usuarios das diversas aerolíneas a reclamar os seus dereitos cando se produzan situacións de “overbooking”, atrasos importantes nos voos ou cancelacións dos mesmos, no marco da campaña informativa de verán que puxo en marcha recentemente.

Segundo lembra ASDETOUR, o “overbooking” ou exceso de reservas é un dos problemas máis comúns nos aeroportos, xa que é unha práctica lícita, aínda que os inconvenientes que xera poden causar prexuízos aos usuarios.

Ante estes, os clientes poden pedir o reembolso sen penalización do prezo do billete correspondente á parte non efectuada da viaxe, ou ben elixir un voo alternativo ata o destino elixido canto antes ou o transporte nunha data posterior que lle conveña.

Así mesmo, ASDETOUR lembra que a aerolínea pagará inmediatamente despois da denegación do embarque unha compensación mínima igual a 150 euros para voos de 3.500 quilómetros como máximo, ou de 300 euros para os que sexan de máis de 3.500 quilómetros en función do destino final marcado polo billete. O transportista encargarase tamén do aloxamento e a manutención.