Ante a proximidade da Semana Santa, a Confederación Española de Consumidores e Usuarios (CECU) deu a coñecer unha serie de consellos prácticos para preparar este período vacacional, co obxectivo de evitar sorpresas de última hora. CECU lembra a todos os consumidores que en vacacións os seus dereitos son os mesmos e, por tanto, deben ser esixidos igualmente.
En primeiro lugar, a Confederación sinala que hai varias cuestións básicas que dependen do lugar de destino que elixamos. Así, en España sempre son obrigatorias as follas de reclamacións en calquera establecemento, pero noutros países esta obrigación non existe. Se se viaxa ao estranxeiro, CECU di que é conveniente ter información relativa ás diferenzas horarias, os costumes gastronómicos e a necesidade de levar DNI ou Pasaporte ou de vacinarse.
Respecto ao transporte, se se ten intención de viaxar en avión, CECU aconsella comparar as diferentes ofertas das compañías aéreas, sobre todo para viaxes ao estranxeiro, e confirmar as reservas uns días antes da saída. Lembra ademais que os dereitos dos pasaxeiros de avión víronse ampliados en canto á práctica do “overbooking”, as cancelacións, os atrasos, os cambios de clase e as perdas de equipaxe.
Se o medio de transporte elixido é o tren, a Confederación indica que o prezo do billete dependerá da data de saída e chegada, e no mesmo vai incluído un seguro de accidentes.
En caso de elixir o autocar, no billete deben figurar datos como a empresa, data, prezo, traxecto, asento ou número de vehículo. CECU lembra que o transportista non responderá os danos, perdas ou avarías que sufran os vultos de man ou outros obxectos non confiados á súa custodia.
De viaxar nun vehículo particular, recoméndase revisalo antes de partir e comprobar que leva toda a documentación necesaria. A Confederación sinala ademais que é mellor viaxar de día e, en caso de distancias longas, facer descansos cada hora e media ou dúas horas.
Aloxamentos
En canto ao aloxamento, nos hoteis débese verificar que a categoría é igual que a ofertada e contratada. En caso contrario, o usuario pode solicitar o cambio a outro de iguais características ás contratadas ou o reembolso de parte do diñeiro pago.
Se nos imos a aloxar nun cámping, hai que ter en conta que é obrigatorio que as tarifas estean á vista do público. É recomendable ademais informarse da localización do mesmo, para acudir a aqueles que non presenten ningún risco por choivas ou desprendementos.
De optar por alugar un apartamento, CECU lembra que se debe realizar a reserva sempre con contrato por escrito, onde figure o tipo de apartamento turístico.
Por último, de acudir a un aloxamento de tipo rural, é aconsellable facer as reservas con suficiente antelación. Nestes casos o máis habitual é pagar por habitación e día de estancia, aínda que nalgunhas ocasións é obrigatorio alugar casas enteiras nas que a estancia mínima é un fin de semana ou, mesmo, unha semana.
