A XXIV edición da Feira Internacional de Turismo FITUR pechou onte as súas portas coa expectativa de que o turismo vai crecer no futuro, a pesar da cifra de caída rexistrada en 2003, un 1,7% a nivel mundial, anunciada polo secretario xeral da Organización Mundial do Turismo (OMT), Francesco Frangialli.
A participación que tivo a feira, primeira do ano do sector, máis de 11.000 empresas provenientes de 170 países, deixou patente que o “fenómeno do turismo é imparable”, tal e como lembrou o ministro de Economía, Rodrigo Rato, no acto de inauguración do evento o pasado 28 de xaneiro.
Nin os problemas que causaron os diferentes conflitos bélicos recentes, nin a epidemia de pneumonía atípica, nin os recordos do 11-S, evitaron que durante cinco días o recinto feiral Juan Carlos I de Madrid presente un gran nivel de participación.
FITUR, segundo os organizadores, xa se ha granjeado un oco entre os grandes eventos do turismo mundial, e compite de xeito conxunto coa Feira de Londres e a de Berlín, por ser a primeira.
Entre as grandes
As cifras deste ano son rotundas, xa que, segundo a organización, participaron máis de 11.000 empresas (10.000 na pasada edición), provenientes de 170 países que ocuparon, por vez primeira, os dez pavillóns do recinto feiral.
Pero se esas cifras son importantes xa de seu, aínda o son máis as de participantes profesionais que se aproximaron, segundo os organizadores, aos 100.000, cun incremento dun 5% con respecto aos 97.570 da pasada edición.
O mesmo ocorreu co público en xeral, que tivo dous días, sábado 31 de xaneiro e domingo 1 de febreiro, paira visitar a feira e levar algún recordo. Na pasada edición rexistrouse a entrada en dous días de 113.000 persoas, e paira a actual, todo fai indicar que a pesar dos 6 euros de entrada que había que pagar por percorrer os pavillóns, esa cifra superouse con fartura.
España segue subindo
A feira tamén serviu para que a OMT, que estreou titularidade como organismo da ONU, volvese recoñecer, un ano máis, que mentres no resto do mundo as cousas van regular, en España segue subindo o número de persoas que nos visitan.
Durante 2003, o turismo mundial decreceu 1,7 puntos, mentres que a conca mediterránea creceu cero e España aumentou a chegada de turistas nun 0,28%, o que parece bastante se se compara co resto de países competidores que non creceron nada. En canto á feira en si, esta vez houbo record de participación estranxeira, que aumentou a súa presenza nun 19,4%.
